睇埸 – 迎. Joyous one – 元朗 (馬田路)

由於賓客人數突然急劇上升, 尖沙咀<迎>>個場已經唔夠擺, 被迫要放棄, 其實真係有d失望. 不過如果d大陸親戚唔請, 之後又要返大陸食多餐, 不如一次過擺多小小攪埋佢, 始終一次過大班人開心d, 熱鬧d.

怕麻煩既我又要再諗過個場. 上網睇左好多係tst既酒樓, , 煌府系列, 無論Catwalk天橋, 飛天車, golf車都真係太浮誇, 完全唔係我杯茶, 更加唔配合駱先生一如以往既低調作風. 利寶閣我媽媽飲過又話麻麻, d升降機冇板隔開, 唔洗送客d人自己各散東西走曬, 北京樓, 映月樓果d普遍樓底都冇The one咁高, 礜宴其實都靚, 但圍數又唔夠. 慢慢覺得tst真係選唔落, 駱先生又叫我唔好咁辛苦局限自己係尖沙咀區, 我開始延伸下諗下其他地區, 九龍灣其實有幾個靚埸, 不過太遠交通又唔方便, 搵自己黎攪,  旺角,荃灣?  都似都唔係太岩心水, 咁不如近近地搵返元朗就自己?

訓唔著幾晚, 心情好不安之制, 突然”叮”一聲上網睇下元朗間<<迎>>, 咁岩係前一日有WOW友睇過場, POST出黎D相都幾吸引, 仲用好靚好新同平黎形容, 最唔好就係洗手間係酒樓外面(呢個我覺得完全唔係D咩問題), 雖然我從來冇諗過自己會係元朗擺酒, 但可能先入為主左, 始終覺得<<迎>>既裝修最精簡, 最岩我地兩個, 冇水晶燈, 冇城堡, 冇紫紫紅紅, 好舒服. 咁岩自己又住得近, 等駱先生一放工, 我就捉佢同我一齊去睇場.

Max席數: 28-30
包全埸價: 18000 (有88折, 唔知做到幾時)
15席包半場, 16席包全埸

當晚大約8點去到, 人唔多, 酒樓新開左3-4個月,  其實前身都係稻香集團, 不過而家大變身做專做婚宴酒樓, 所以配套都好齊全. 淨係睇個門口其實都比一般商場酒樓有氣派得多, 酒樓係地舖win左The one迎, 唔洗等3,4個字排隊等lift先啦. 左右兩邊各一條白色羅馬柱, 招牌得一個迎字, 仲要係有光係後面打出黎, 超有型!

入到去已經見們佢間酒樓既賣點, 超大LED電視,  樓底適中, 光猛, 好新淨, 一入到去感覺真係好WEDDING, 佢既基本佈置, 証婚Table, Candy Bar Table, 接待位都已經好靚, 對我黎講已經好夠用, 唔洗再花錢係佈置身上, 駱先生話呢D野其實冇咩人睇, 佢又考我, 問我D FD結婚時D枱花係點既樣, 我都啞左... 所以夠用就ok, 唔好over做埋d浪費錢又冇意思同效果既事. 個Backdrop雖然唔好似尖沙咀咁全個都係白色通花,  但佢LED電視左右兩邊仍然都係白色通花一樣咁靚架, Remote拉返埋塊紗就可以影相, 只係唔包backdrop名牌, 不過出面做都好平, 所以唔大影響. 同埋個stage就大過尖沙咀好多.

Service方面, 唔知係咪新店, 派左個十分Friendly既經理落黎, 比倒反應我地既, 上次係尖沙咀果個真係唔憂做, 呢個主動性強好多, 一入到去問婚宴, 楊小姐(即經理) 行出黎話先帶得睇下新娘房先, 沿路係正中行入去就係match in既路線, 中間有條星光大道, 有小小特別, 但就唔係浮誇囉. 之後介紹backdrop, 燈光, 音響效果, control room.,枱布花款., 喜帖,新娘房其實算細, 但迫迫地都夠用既, 最緊要佢有獨立洗手間. 基本上佢講野清楚, 你都唔需要再點問野, 真係加左分.

總括黎講, 除左地點, 海景同露台, 我覺得其他野元朗都係高分d,  但當然佢都有缺點, 就係交通其實唔太方便, 但係佢靜又係我其中鐘意佢既原因之一. 問埋長輩, 如果冇問題, 我應該好大機會都會落訂喇. 睇中<<迎>>個人終於定返d.