婚紗展

其實兩個未結過婚既人突然話結婚,我估十個有八個都好會迷網, 就因為有我地呢班咁迷網既人就出現左婚紗展呢件事. 得知14-16/3 係會展有個婚展, 膽粗粗問下駱生去唔去行下, 點知佢一口就應承, 抵錫到冇人有. 1同屋企人飲完茶我地就出發去我地第一次既婚紗展喇, 因為新手冇經驗, 我地成5點先入到會埸, 但人地收8點, 所以實際行左一個圈都冇.事後覺得果40蚊好浪費. 婚紗展就其實好似一個困獸鬥咁, 入左黎出唔返去, 小d定力都死得既地方. 平均一年有成5,6個婚展, 佢地的行銷手法真係層出不窮, 此行真係大開眼界, 學倒好多野.

請返果日, 一入到就比果間娘到爆既浪漫一生Taiwan pre-wedding公司拉住左, 講左差唔多半個中, 其實個過程都幾9唔搭8, 問佢d問題, 佢唔會即時答你, 硬就帶你遊下花園呀, 攪一大輪先比個價錢你, 呢間野, 又貴又娘, 其實唔知點解咁出名. 定係其實佢唔差只係我對佢印象麻麻? 不過點解我對佢印象麻麻都會坐低聽佢講一大輛, 個原意係我地考慮緊去台灣紅豆婚紗影pre-wedding, 所以就專登黎compare一下其實台灣pre-wedding公司既package.
係一生起身之後, 接著又比薇薇新娘拉住左, 又係另一間Taiwan pre-wedding公司, 其實薇薇都幾出名, 感到比浪漫一生好D, 但都唔係我杯茶. D造影都係麻麻, 好地地著套婚紗唔知攪咩又帶條絲巾係頸?!?!怪怪地. 因為時間關係我地好想拿拿聲問左價錢就起身, 點知真係好難. 個sales小姐真係幾煩, 相本睇完一本又一本, 我多次要求佢比價錢我, 問到口乾先肯比, 要佢張咭片又係同樣難. 到入正題, 佢面價14888, 一本大相簿, 大油畫, 相架, 傾到我地好想起身, 當到佢拉左一次香港經理同台灣經理黎送呢樣送果樣, 最後佢地既offer係, 一本大相簿,原先30p加多10p, 送多一本中size, 一本細size, 油畫size加大, 60寸poster(呢張野好靚), Hk$9888. 足足平左5千蚊多左好多野送, 不過我地仍然好有定力. 紅豆依然係我pre-wedding既首選, 咩原因下回再分享.…雖然薇薇平左足足5千蚊, 但都仲有好多配套唔包, 要另外加錢, 例如化妝師外出, 包車都要另外加錢, 所以就數平左都覺得唔合理.
 係薇薇起身就開始後悔點解自己咁晏先黎, d野好似走馬看花, 根本冇細心睇過, 同埋比果2間野轟炸先, 我地兩個地戰鬥力下降曬, 感到有d攰,最後15分鐘, 行到會場既右邊, 有好多酒席既booth, 唔記得咩原因我地入左去稻香集團<<迎>>個Booth度, 可能係比佢個海景吸引左, 而家星期六日包埸價188000有8折, 間野係The one, 又有sea view, 樓底又過真係好唔錯, 但一問之下, 2015年既10,11,12月各得返1日. 而我地係連日子都未定, 我真係開始好擔心!
傾唔夠10分鐘要散場, 冇機會睇埋其他酒店同酒樓個booth有d失望. 希望d心水酒樓唔好咁快比人book曬啦.

2014年3月16日